Raförninn ehf

Sérfræðinefnd innan Lyfjastofnunar Evrópu, Pharmacovigilance Risk Assessment Working Party (PRAC) sendi nýlega frá sér tilkynningu þar sem mælt er með að fjórar tegundir skuggaefna fyrir segulómrannsóknir verði teknar af markaði, vegna uppsöfnunar þeirra í heilavef. Næsta skref er að sérfræðinefnd Lyfjastofnunar Evrópu um lyf fyrir menn, Committee for Medicinal Products for Human Use (CHMP) fer yfir málið og einnig hafa framleiðendur möguleika á að fara fram á endurumfjöllun.

Ráðleggingar í varúðarskyni
Þetta eru allt “linear” Gadolinium skuggaefni og sum meðal þeirra sem algengast er að nota hérlendis. Í grein hjá AuntMinnie Europe má meðal annars sjá að vörumerkin eru Magnevist frá Bayer Healthcare, MultiHance frá Bracco, Omniscan frá GE Healthcare og Optimark frá Guerbet.
Rétt er að undirstrika að öll skuggaefnin eru enn á markaði og engar takmarkanir á notkun þeirra. Í tilkynningu frá Lyfjastofnun Evrópu er einungis mælt með að þau verði tekin af markaði í varúðarskyni og eins og áður segir er bæði eftir að fjalla nánar um málið hjá stofnuninni og eins hafa framleiðendur tækfæri til að óska eftir endurupptöku þess.

Lyfjastofnun á Íslandi birtir nýjustu upplýsingar
Í frétt frá Lyfjastofnun hérlendis er meðal annars bent á að ekki hafi verið sýnt fram á heilaskaða vegna upphleðslu þessara efna og ekki sé heldur vitað um langtímaáhrif á heila en lítið sé til af gögnum til að sanna eða afsanna áhættu tengda þessari uppsöfnun í heila.
Arnartíðindi höfðu samband við Hrefnu Guðmundsdóttur, sérfræðing hjá Lyfjastofnun, og sagði hún erfitt að segja til um hvenær málslok yrðu. Að svo stöddu hefði Lyfjastofnun sent tilkynningu til Landspítala og til formanns Félags röntgenlækna á Íslandi, auk þess sem nýjustu upplýsingar væri alltaf að finna á vefsíðu stofnunarinnar.

Félag íslenskra röntgenlækna fylgist vel með
Hjá Maríönnu Garðarsdóttur, formanni FÍR, fengust þær upplýsingar að félagið hefði um nokkurn tíma vitað af þessari athugun á “linear” Gd skuggaefnum og í tengslum við það hefði nýlega verið haldinn fræðslufundur um þessi mál. Stjórn félagsins hefur verið í góðum samskiptum við Lyfjastofnun og fylgist grannt með málinu.
Maríanna bætti við að á Landspítalanum hefðu engar ákvarðanir verið teknar enn, enda eins og áður segir aðeins um ráðleggingar að ræða. Möguleikar á notkun skuggaefna þar sem Gd er bundið í hringlaga sameindir (macrocyclic) væru í skoðun en fyrst og fremst fylgst vel með umræðu, m.a. hvort einhverjir ákveða að hætta notkun “linear” skuggaefnanna.

Fyrirlestur um Gd uppsöfnun verður á Nordic Congress of Radiology & Radiography
Uppsöfnun á Gd í heilavef er eitt af því sem var til umfjöllunar á RSNA ráðstefnunni nú fyrir áramót og meðal þess sem hefur blásið nýju lífi í umræður um öryggismál við MR rannsóknir. Nokkur atriði um þetta má sjá í grein sem birtist hér á raforninn.is í ársbyrjun.
Einnig er rétt að minna á að strax fyrsta daginn á norræna þinginu sem haldið verður í Reykjavík dagana 29. júní til 1. júlí nk. verður Emanuel Kanal með fyrirlesturinn “Intracranial and total body gadolinium accumulation – update regarding findings and ramifications” sem enginn úr hópi myndgreiningarfólks ætti að láta framhjá sér fara.

Arnartíðindi þakka Hrefnu og Maríönnu fyrir.

.

Embætti Landlæknis setti nýlega af stað tilraunaverkefni sem snýst um þjónustukönnun meðal notenda heilbrigðisþjónustu. Til reynslu fer könnunin fram á fjórum stöðum á landinu, hún er gerð á rafrænan hátt og geta stjórnendur á stöðunum nýtt vikulegar niðurstöður til umbótastarfs. Áhugavert gæti verið fyrir röntgendeildir að gera slíkar þjónustukannanir hjá sér þegar verkefninu vindur fram.

Tilraunaverkefni á fjórum stöðum á landinu
Könnunin var nýlega sett af stað á Heilsugæslunni í Grafarvogi, Heilsugæslunni á Sauðárkróki, bráðamóttöku Sjúkrahússins á Akureyri og hjarta-, lungna- og augnskurðdeild Landspítala. Í frétt á vefsíðu Embættis landlæknis segir meðal annars að embættið vilji vekja athygli á hversu reynsla notenda sé verðmæt uppspretta upplýsinga sem nýtast í umbótastarfi og þar skipti þjónustukannanir miklu máli.

Áhugaverðar niðurstöður strax farnar að skila sér
Arnartíðindi leituðu upplýsinga hjá Lauru Scheving Thorsteinsson, sem er staðgengill sviðsstjóra sviðs eftirlits og gæða hjá Embætti landlæknis, og sagði hún að tilraunaverkefnið stæði í eitt ár en þegar væru farnar að skila sér áhugaverðar niðurstöður. Of snemmt væri þó að birta neitt ennþá en vonast væri til þess að næstu fréttir gætu birst í maí nk. Hún sagði mikilvægt að nýta vel tímann á meðan tilraunaverkefnið væri í gangi, sníða af vankanta og meta kosti og galla, ásamt því að ákveða framhaldið.

“Við höfum þegar heyrt frá fólki sem hefur mikinn áhuga á að geta gert slíka könnun hjá sér og við fögnum því að áhugi er fyrir hendi,” sagði Laura. “Það er hægt að gera þessar kannanir hvar sem er í heilbrigðisþjónustu og aðhæfa spurningalista ef þörf krefur, til dæmis mætti vel hugsa sér að gera svona könnun á myndgreiningardeild.”

Spennandi innlegg í gæðastarf
Í myndgreiningu, eins og annarsstaðar í heilbrigðisþjónustu, hefur fókus á gæði þjónustu aukist mjög á síðustu árum og hérlendis hefur meðal annars mátt merkja það á sífellt meiri áhuga og aðsókn á Gæðavísisráðstefnum Rafarnarins.
Málaflokkurinn fékk mikla athygli á síðustu RSNA ráðstefnu í Chicago og meðal þess sem fram kom á “Quality Improvement Symposium” ráðstefnunnar var að í niðurstöðum kannana hefur orðið vart við óvæntan mismun á því sem myndgreiningarfólk telur mikilvægast fyrir gæði þjónustunnar og hvað notendum þjónustunnar finnst mikilvægast.
Í grein í veftímaritinu Diagnostic Imaging má sjá að í starfi Commission on Patient-and Family-Centered Care hjá bandarísku samtökunum American College of Radiology hefur komið í ljós að um 90% af því sem sjúklingar telja hafa mest virði í þjónustunni sem þeir fá snýr að öðru en læknisfræðilega hlutanum. Nefnt er að til að meta raunverulegt virði heilbrigðisþjónustu í nútíma samfélagi sé nauðsynlegt að spyrja sjúklinga réttu spurninganna og nýta innlegg þeirra í að finna bestu lausnirnar.

Þjónustukannanir á myndgreiningardeildum?
Líklegt er að það væri mjög gagnlegt fyrir myndgreiningardeildir að geta gert þjónustukannanir hjá sér, eins og nú eru komnar af stað í tilraunaverkefni Embættis landlæknis. Það verður þess vegna sérlega áhugavert að fylgjast með framvindu verkefnisins og sjá hvert framhaldið verður.

Arnartíðindi þakka Lauru fyrir.
.

Stóra Evrópuráðstefna myndgreiningarfólks, ECR í Vínarborg, er alltaf glæsilegur og áhugaverður viðburður og í þetta sinn var hún haldin 1. – 5. mars. Það var frekar fámennt en sérlega góðmennt í Íslendingahópnum í ár og faglegur metnaður í fyrirrúmi eins og ætíð.
Arnartíðindi fylgdust með af hliðarlínunni og eitt og annað skemmtilegt skaut upp kollinum á Facebook.

Ráðstefna í stöðugri þróun
Að vanda var ráðstefnan haldin í Austria Center Vienna, þar sem umgjörðin er glæsileg ásamt því að húsakynni og tækni halda vel utanum svo stóran viðburð.
Það er European Society of Radiology sem heldur ráðstefnuna, hún er í sífelldri þróun og eitt af því sem lögð hefur verið áhersla á undanfarin ár er að miða dagskrá og markaðssetningu meira að geislafræðingum, auk þess sem tæknisýningunni hefur verið gert hærra undir höfði.

Stærri, fjölbreyttari, flottari
Dagskráin var geysilega fjölbreytt og hægt er að skoða hana bæði í heild og eftir ýmsum flokkum, t.d. alla dagskrárliði sem merktir eru sérlega áhugaverðir fyrir geislafræðinga.
Einnig má benda á mjög vandað yfirlit um útdrætti, “abstracts”, frá ECR 2017 sem birtist í aukahefti af tímaritinu “Insights into Imaging” og er hægt að hlaða niður frítt hjá Springer Link.

Íslendingar á ferð og flugi
Íslendingar áttu sinn fulltrúa í dagskránni en strax á fyrsta degi ráðstefnunnar stýrði Maríanna Garðarsdóttir, röntgenlæknir, Scientific Session SS 303 sem snerist um hjartarannsóknir og bar þá skemmtilegu yfirskrift “Cardiac function: What is hot?”
Auk þess var að sjálfsögðu lagt mikið í kynningu á Norræna þinginu, “Nordic Congress of Radiology” sem haldið verður í Reykjavík 29. júní – 1. júlí næstkomandi. Maríanna var þar fremst í flokki og fleiri Íslendinga mátti líka sjá á kynningarbás þingsins.

Aðgengi að efni frá ráðstefnunni
Þeir sem heima sátu áttu þess kost að fylgjast með ráðstefnunni á ECR Online, þar sem boðið var upp á beinar útsendingar á meðan hún stóð yfir. Einnig er hægt að horfa á upptökur frá dagskrárliðum og sú leið er áfram opin að ráðstefnunni lokinni. Þessi þjónusta er ókeypis og yfir 1500 dagskrárliðir aðgengilegir!

Einnig er Minna frænka í Evrópu með klassískt “RADCast” frá ECR 2017 þar sem hægt er að skoða fréttir, viðtöl, ljósmyndir, video og allt sem nöfnum tjáir að nefna.

Svo má heldur ekki gleyma Facebook, bæði síðu ESR og síðu Rafarnarins 🙂

Raförninn þakkar þeim sem sendu myndir og annað skemmtilegt. Myndasyrpan hér fyrir neðan er í boði Örnu Ásmundardóttur hjá Röntgen Domus.

Framadagar háskólanna voru haldnir í Háskólanum í Reykjavík fimmtudaginn 9. febrúar og í ár tóku Raförninn og Image Owl í sameiningu þátt í þriðja sinn. Viðburðurinn er á vegum ungmennasamtakanna AIESEC og skipulagður af nemendum úr háskólum landsins, með það fyrir augum að tengja háskólanema og atvinnulífið.

.
Fastur liður í háskólalífinu
Framadagar hafa verið haldnir allt frá árinu 1994 og viðburðurinn fer sífellt stækkandi. Nemendur fá tækifæri til að nálgast upplýsingar um hvert fyrirtæki og komast í kynni við starfsmenn þess með því að heimsækja bása sem fyrirtækin setja upp, auk þess sem hægt er að sækja spennandi örfyrirlestra úr ýmsum áttum og fleira áhugavert er í boði. Upplýsingar er meðal annars hægt að fá á vefsíðu Framadaga og á Facebook.

Kynning á gæðamælingakerfum og fleiru
Ingvi Steinn Ólafsson hélt utanum þátttöku Rafarnarins/Image Owl í Framadögum en margir fleiri úr starfsmannahópnum komu að verkefninu.

Að sögn Ingva var höfuðmarkmiðið almenn kynning á starfsemi fyrirtækisins og voru hinar ýmsu þjónustur kynntar, meðal annars gæðamælingakerfin TQA og CatphanQA og TomoQA. Prófunarlikön (phantom) voru til sýnis og gestum sem komu í básinn bauðst að taka með sér minjagrip, sérlega flottan lyklahring sem er jafnframt vasaljós og flöskuopnari.

Starfsfólk Rafarnarins/Image Owl þakkar öllum sem kynntu sér starfsemi fyrirtækisins.

.

Raförninn hefur verið valinn eitt af framúrskarandi fyrirtækjum á Íslandi, sjötta árið í röð, og er í hópi traustustu fyrirtækja landsins. Starfsfólk Rafarnarins er stolt af þessari viðurkenningu og stefnir á að halda rekstrinum áfram á sömu braut, um leið og sífellt er unnið að því að veita viðskiptavinum sem besta þjónustu.

Síðastliðin sjö ár hefur Creditinfo unnið ítarlega greiningu sem sýnir rekstur hvaða íslensku fyrirtækja telst til fyrirmyndar. Að þessu sinni komust 624 fyrirtæki á listann af þeim rúmlega 35.000 sem skráð eru í hlutafélagaskrá. Á þennan lista komast eingöngu þau fyrirtæki sem staðist hafa styrkleikamat Creditinfo og uppfylla ströng skilyrði sem lögð eru til grundvallar við greininguna.

Við valið eru síðustu þrír ársreikningar fyrirtækja lagðir til grundvallar og þurfa þau meðal annars að sýna fram á jákvæðan rekstrarhagnað og ársniðurstöðu. Horft er til stöðugleika í rekstri frekar en afkomu einstakra ára, eignir þurfa að vera meira en 80 milljónir þrjú rekstrarár í röð og eigið fé 20% eða meira. Einnig þurfa fyrirtækin að vera í flokki 1-3 í CIP áhættumati Creditinfo.

Eins og áður segir hefur Raförninn hlotið þessa viðurkenningu ár hvert frá og með árinu 2011.

Sjá nánar á vef Creditinfo.

.